Kurtefilmê sînemavan Yakup Tekîntangaç ê bi navê “Morî” ew ê îsal li Festîvala Kurtefilman a Oberhausen promiyera xwe ya dinyayê pêk bîne. Filmê “Morî” ji nav 6300 kurtefilmî hate hilbijartin û ew ê ji bo xelata “Kurtefilmê Herî Serketî” di pêşbirka festîvalê de cihê xwe bigire.
Festîvala Kurtefilman a Oberhausen ew ê di navbera 1 û 6’ê Gulana 2024’an de cara 70’an li bajarê Oberhausen ê Elmanyayê were lidarxistin. Ev festîval li dinyayê yek ji festîvalên herî baş a kurtefilman tê qebûlkirin.
Yakup Tekîntangaç ku bi kurtefilmê xwe yê “Azad” hate naskirin piştî 8 sal şûnde dîsa kurtefilmek çêkiriye. Ew di kurtefilmê Morî de behsa keçeke bi navê Morî dike ku mamosteyê dibistanê weke bavê xwe dihesibîne.
Derhêneriya dîmenê kurtefilmê “Morî” Emre Pekçakar e û Mustafa Bîber jî ji bo kurtefilm muzîk çêkirine.
Yakup Tekîntangaç di sala 1980’an de li Agirî hatiye dinyayê û qederê 4 salan tevlî xebatên Kolektîfa Sînema ya Mazopotamyayê bû. Wî filmê xwe yê bi navê “Azad” di sala 2016’an de çêkir û piştî vî filmî film çênekiribû.
NAVENDA NÛÇEYAN
