Malbata Rojîn li benda edaletê ne

Mirina gumanbar a Rojîn Kabaiş, xwendekara sala yekem a Beşa Pêşveçûna Zarokan a Zanîngeha Yuzuncu Yil a Wanê, meha xwe ya 10'emîn derbas kir. Tevî derbasbûna demê û têkoşîna domdar a malbata wê ji bo edaletê, di ronîkirina mirina bi guman de tu pêşveçûn çênebûye. Xwişka Rojîn Kabaîş, Elîf Kabaîş û dayika wê Aygul Kabaîş, li ser mirina bi guman a Rojîn Kabaîş axivîn. Xwişka Rojîn Kabaîş, Elîf Kabaîş, yekem kes bû ku li ser windabûna Rojîn Kabaîş agahî da û got:"17 saet şûnda wargehê agahî da me. Roja din derdora saet 12:30'an gazî me kirin û pirsîn, 'Keça we venegeriyaye wargehê. Hûn haydar in?' Me got, 'Em haydar nebûn.' Bi gelemperî, divê ew saet 11:00'ê şevê ku dema derketinê ji bo xwendekarên ku nehatine ye, agahî bidin me, lê wargehê 17 saet şûnda agahî da me. Ev xemsariya wargehê ye. Bavê min wê demê li Êlihê bû. Ew yekser ji Êlihê çû Wanê. Piştre, em û xizmên me yên ji Amedê hemû çûn Wanê. 18 rojan em li Wanê ketin pêy Rojînê. Piştî 18 rojan, ew 25 km dûrî wargehê, li peravên Mollakasimê hate dîtin. Herikîna berevajî Rojîn biribû Mollakasimê. Av nikarîbû wê ewqas dûr bibe."

DNA'ya du mêran li ser laşê wê 

Elîf Kabaîş, destnîşan kir ku di dema otopsiya Rojîn Kabaîş de DNA'ya du mêran hatiye dîtin, lê nasnameyên wan nehatine eşkerekirin û wiha got:"Zêdetirî 10 meh derbas bûn. Êşa me hîn nû ye. Ez û bavê xwe ji roja yekem ketin li pêy pêkanîna edaletê. Li ser dosyayê fermana nepenîtiyê hebû. Beşek ji fermana nepenîtiyê hatiye rakirin, lê ji ber ku bi tevahî ne diyar e, tu agahî ji me re nayê dayîn. Delîl, guman hene, lê tu teqezî tune. Ew îdia dikin ku mirina Rojîn xeniqiye, lê DNA'ya du mêran li ser laşê wê hat dîtin." Dayika Rojîn Kabaîş, Aygul Kabaîş, diyar kir ku Rojîn Kabaîş xwe nekuştiye û ew bi kêfxweşiyeke mezin çûye dibistanê û wiha axivî: "Ne dibistan û ne jî wargeha wê lênêrîna wê kirine. Divê yên ku ev kirine werin girtin. Em şev û roj dipirsin ka kê ev bi serê keça me kiriye. Dibêjin DNA'ya du mêran hatiye dîtin, lê nabêjin ev her du mêr kî ne. Rojîn keça her kesî bû. Malbatên wan jî dilşikestî ne û digirîn. Ma ne şerm e? Divê dayik negirîn. Bila bizanin ka çi bi serê Rojînê hatiye, da ku em rihet bibin."

JINNEWS/GULISTAN GULMUŞ