Komplo bi yekîtiya neteweyî pûç dibe

Hevserokê Kongreya Neteweyî ya Kurdistanê (KNK) Ahmet Karamûs, derbarê komploya navneteweyî ya li dijî Rêber APO hate pêkanîn nirxandin kirin. Karamûs diyar kir ku hêzên emperyalîst ji bo jiholêrakirina hêzên siyasî û îdeolojîk ên li dijî berjewendiyên wan tevgeriyane û got:"Rêxistina Rizgariya Filistînê (RRIF) ku gelek komên filistînî di nav xwe de digirt, hat tasfiyekirin. NATO, di hewldana xwe ya ji nû ve sêwirandina Rojhilata Navînê de an cudahîyên herêmî ji bo xwe bi kar anî an jî hewl da ku wan ji holê rake. Ji bo jiholêrakirina hêzên ku wekî gef didît, tevgeriya. DYE êrişa Iraqê ya li ser Kuweytê da destpêkirin û piştre jî dagir kir. Komploya li dijî birêz Ocalan piştî van pêşketinan dest pê kir. Ev aliyê navneteweyî yê vê komployê ye."

Komplo negîhîşt armanca xwe

Karamûs diyar kir ku armanca komployê ew bû ku Ocalan ji holê rake û tevgera azadiya kurd neçar bike ku teslîm bibe û got:"Komplo negihîşt armanca xwe. Hêzên ku beşdarî komployê bûn bawer dikirin ku girtina birêz Ocalan wê PKK'ê ji holê rake. Wan hêvî dikir ku di Rojhilata Navîn de bêyî PKK'ê, ew ê karibin Projeya Rojhilata Navîn a Mezin (BOP) bi hêsanî bicîh bînin. Lê belê, îdeolojiya birêz Ocalan di nav gel de rehên kûr hebûn. Hêzên komploger vê yekê pêşbînî nedikirin. Armanca destpêkê ya komployê ji ber piştgiriya gel ji bo tevgerê nehişt ku bigihîje armanca xwe. 27 sal derbas bûn û ew hîn jî negihîştine armanca xwe. Tevgera ku ew dixwazin ji holê rakin her roj mezin dibe."

Ocalan divê azad bibe 

Karamûs bal kişand ser pêwîstiya misogerkirina azadiya fizîkî ya Ocalan û biryara Dadgeha Mafên Mirovan a Ewropayê (DMME) ya li ser "mafê hêviyê" bi bîr xist. Karamûs destnîşan kir ku biryar hîn jî nehatiye bicîhanîn û got:"Paradîgmaya birêz Ocalan ji bo her kesî li qada navneteweyî bûye çavkaniya hêviyê. Ger saziyên ewropî samîmî bûna, 'mafê hêviyê' wê ji zû de bihata bicîhanîn û birêz Ocalan wê azadiya xwe ya fizîkî bi dest bixista. Lêbelê, Tirkiye polîtîkayên ne samîmî dimeşîne. Bikaranîna pêvajoyê wekî maskeyek ji bo xwe û plankirina tasfiyekirina wê nayê qebûlkirin. Çawa ku komplo negihîşt armanca xwe, ev polîtîka jî wê negihîje armanca xwe. Divê Tirkiye tavilê qanûnên xwe bicîh bîne û birêz Ocalan karibe bi azadî bixebite û bijî."

Divê Kurd yekîtiya xwe pêk bînin 

Karamûs destnîşan kir ku yekîtiya neteweyî wê komployê bi temamî pûç bike û got:"Di hevdîtina xwe ya yekem de bi parêzerên xwe re birêz Ocalan pirsî ka ji bo kongreyê çi hatiye kirin. Yekîtiya neteweyî ji bo zindîbûna paradîgmaya birêz Ocalan pir girîng e. Em îro ji her demê bêtir hewceyê vê yekê ne. Di Civata Giştî ya Neteweyên Yekbûyî (NY) ya dawî de, me careke din bi zelalî dît ku çima divê kurd yekîtiya xwe ya neteweyî bi dest bixin. Yek ji armancên komployê pêşîgirtina li yekîtiya wan a neteweyî bû. Ger kurd yekîtiya xwe ya neteweyî bi dest nexin, ew ê derfeta xwe ya dîrokî ji dest bidin."

MA/EMRULLAH ACAR