Karwanê Meşa Rêzgirtinê li Enqerê ye

Karwanê Meşa Rêzgirtina li Vînê ya DEM Partiyê li Stenbolê dabû destpêkirin, gihişt Enqereyê. Di axaftinan de hate gotin siyaseta qeyûm nagihe ti deverê, bang hate kirin ku gav bi paş ve were avêtin û her wiha hate gotin heta ku qeyûm hebe ew ê têbikoşin.

Meşa Rêzgirtina li Vînê ya Partiya Wekhevî û Demokrasiyê ya Gelan (DEM Partî) li dijî desteserkirina vînê dabû destpêkirin, gihişt Enqereyê. Karwanê ku ji Stenbol û Îzmîrê ketine rê û wê ber bi Colemêrgê ve bimeşin li Enqereyê gihiştin hev. Karwanê ku li Parka Kurtuluşê bi girseyî hatine pêşwazîkirin, piştre derbasî Cadeya Sakaryayê bû. Di meşê de dirûşmên “Bijî berxwedana Colemêrgê”, “Li dijî faşîzmê mil bi mil”, “Li ber xwe bide Colemêrg, Enqere bi te re ye”, “Qeyûm bicehnime” hatin berzkirin.

Heya qeyûm biçe têkoşîn wê bidome

Berdevka Meclîsa Jinan a DEM Partiya Enqereyê Nebahat Çalpan destnîşan kir ku ew li dijî desteserkirina vînê serê xwe netewînin û wiha got: “Heya ev bermahiya Rewşa Awarte tê betalkirin, heya ku zexta ser bijartiyan tê rakirin wê têkoşîna me bidome. Netewperestiyê har dikin û dixwazin civakê ji hev veqetînin. Şaredariyên DEM Partiyê bi dest xistine dixwazim bi rêbazên darbeye desteser bikin.”

Ev siyaset naçe deverekê

Çalpan da zanîn ku polîtîkayên qeyûm û tecrîdê dê ji gel re şer û karesatê bîne û axaftina xwe wiha domand: “Ev siyaseta ji gelê me re aştî, yekitî û aramiyê zêde dibîne wê we nebe li cihekî. Cihê ku diçe karesat e. Hêj ku rê nêzîk e, dest ji siyaseta xwe ya şer, talan, zext û zordariyê berdin. Tecrîdê bi dawî bikin, deriyên diyalog û hevdîtinan vekin û biryara Meclîsa Şaredariya Colemêrgê ya li şûna Mehmet Sidik Akiş, Viyan Tekçeyê wek şaredar hilbijartiye qebûl bikin.”

Em qeyûman nasnakin

Piştre parlamentere DEM Partiyê yê Wanê Mahmût Dîndar axivî û ev tişt anî ziman: “Desthilata AKP-MHP’ê li Kurdistanê darbeyekî mezin xwar û vê yekê ranagire. Hezar û yek fêlbazî di hilbijartina 31’ê Adarê de kirin lê belê winda kirin. Niha jî bi siyaseta desteserkirinê ji me re dibêjin ku em vîna we nas nakin. Qeyûm erdnîgariya Kurdistanê talan kirin. Em îro jî ji Enqereyê dengê xwe bilind dikin. Em mirovên edalet, maf, wekheviyê diparêzin dê rê nedin desteserkirinê. Em van qeyûman nas nakin û wê heya ev bêhiqûqî paş de vedikişe têkoşîna xwe bidomînin.”

Qonaxa dawî Colemerg e

Meşvan wê şevekê li Enqereyê bimînin û dê sibê ber bi Edeneyê ve bikevin rê. Meşvan wê bajar bi bajar meşa xwe bidomînin û dê di 3’yê Tîrmehê de li Wanê dê di 8’ê Tîrmehê de jî li Colemêrgê bin.

ANF/ENQERE