Ji Ewrûpa heta Emerîkaya Latîn

Sêşem 1 Nîsan 2025 - 03:20

  • Li seranserî cîhanê coşa Newrozê di dawiya vê hefteyê de jî bê hempa dewam kir. Ji Ewrûpa heta Emerîkaya Latîn Kurd û dostên xwe bi pîrozbahiyên bi heybet Newroz pîroz kirin û peyama azadiya fizîkî ya Rêber APO dan.

Kurd û dostên xwe li gelek navendên Ewrûpayê û Arjantînê bi pîrozbahiyên bi heybet cejna Newrozê pîroz kirin û banga dîrokî ya Rêber APO mohra xwe li pîrozbahiyan xist. Kurdan û dostên wan ji bo azadiya fizîkî ya Rêber APO peyama mezinkirina têkoşînê dan.

GRAZ

Kurdistaniyan li gel dostên xwe 30'ê Adarê li bajarê Grazê li AK SAAL'ê Newroz bi coşeke mezin pîroz kirin. Çalakî piştî deqeyeke rêzgirtinê ya ji bo bîranîna şehîdên azadiyê yên Kurdistanê destpê kir. Salona pîrozbahiyê bi alên Kurdistanê û posterên Rêber Apo hate xemilandin. Beşdarên pîrozbahiyê tim û tim dirûşma 'Bijî Serok Apo' qîriya. Hunermend Koma Dem, Narîxan û Hozan Diyar hunera xwe pêşkêş kirin.

VIYANA

Li paytexta Awûstûrya Viyanayê bi hezaran Kurdistanî li gel dostên xwe Newroz bi coşeke mezin pîroz kirin. Li gel standên sazî û rêxistinên jin, ciwan, çep û sosyalîst her wiha di çarçoveya kampanya 'Milyonek pirtûk, milyonek zarok' a Ma Musicê de beşek hate avakirin. Endamên Civaka Îslamî ya Kurdistanê jî bi wesîleya Cejna Remezanê şekirê cejnê belav kirin. Hunermend Sîmar, Azad Bedran, Îbo Qamişlo, Koma Dewran, Hozan Ariana, Alî Jiyan û Alî Gavarîn hunera xwe pêşkêş kirin.

ÎNNSBRUCK

Kurdistaniyên ku li eyaleta Tîrol a Awûsturyayê dijîn, di pîrozbahiya Newrozê ya li bajarê Innsbruckê hatin cem hev.

Pîrozbahî bi pêşengiya Navenda Civaka Kurd a Demokratîk a Innsbruckê hat lidar xistin. Di pîrozbahiyê de ji bo bîranîna şehîdên azadiyê ya Kurdistanê deqeyek rêz hat girtin.

Hunermend Şehrîbana Kurdî, Sîpan Xelat, Azad Bedran, Erdogan Emîr, Devrîm Azad, Koma Dem û Koma Demhat derketin ser dikê. Gel li ber muzîkê govend gerand.

LAUTRACH

Li bajarê Lautrach ê eyaleta Vorarlberg ê Awûstûryayê, Kurd û dostên wan di şahiya Newrozê de li hev kombûn. Pîrozbahî bi pêşengiya Komeleya Çand û Hunerê ya Sara pêk hat. Heman hunermendan li vir jî derketin ser dikê.

EXETER

Kurdistaniyên li Brîtanyayê Newroz bi coş pîroz kirin. Şahiya ku ji aliyê Komuna Kurd a Devon-Exeter ve li Navenda Exeter Phoenix hate organîzekirin bi dirûşmeya “Em Rêbertî silav dikin,civaka demokratîk ava dikin” pêk hat. Hunermend Merwan Şan, Memozan û Seyda Perînçek derketin ser dikê û gel li ber stranên wan heta derengî govend gerandin û bênavber dirûşma "Bijî Serok Apo" berz kirin.

EDÎNBURGH

Li paytexta Skoçya Edînburghê li Navenda Civaka Kurd a Demokratîk bi tevlîbûna bi sedan Kurdistanî, enternasyonalîst û siyasetmedarên Skoçyayî, Newroz hat pîrozkirin. Piştî axaftinan, girseyê li ber defan govendê gerandin. Piştre hunermend Barham Shemamy û Koma Renge Welat derketin ser dikê. Kurdistanî û dosyên wan li ber stranên Kurdistan û Newrozê govnedê derandin. 

BUENOS AIRES

Li paytexta Arjantîn Buenos Airesê pîrozbahiya Newrozê bi dirûşmeya, “Civaka Demokratîk û Aştiya Kurdistanê”, bi tevlîbûna zêdetirî 150 kesî re bi coşekê mezin derbas bû.

Di çalakiya ku bi pêşengiya ATE-Nacional pêk hat de li ser Tevgera Azadiya Kurdistanê û çanda Kurd axaftin hatin kirin. 

Komên muzîkê yên Buenos Airesê, koma dîlanê ya girêdayî Ermanan û hunermend Georgia Andino heta derengê şevê bi pêşkêşiyên xwe coşekê mezin avakirin. Gelek nûnerên tevgera jinê û parazvanên mefê mirovan jî tevlî şahiyê bûn û axivîn. Di şahiyê de şehîdên enternasyonalîst Alîna Sanchez û Berta Caceres jî hatin bibîr anîn.

NAVENDA NÛÇEYAN

parvê bike

   

Yeni Özgür Politika

© Copyright 2025 Yeni Özgür Politika | Mafên belavkirinê parastî ne.