Êrîşên bi hevkariya Barzaniyan şermezar bûn
Pêncşem 11 Tîrmeh 2024 - 00:53
Li bajarên Winterthur, Basel yên Swîsre û bajarê Hamburg yê Elmanyayê, êrîşên dewleta Tirk a dagirker ên li ser Kurdistanê bi çalakiyan hatin protestokirin.
WINTERTHUR
Kurdistaniyên li bajarê Winterthur ê Swîsreyê dijîn, li ser banga seferberiyê ya Kongreya Civakên Demokratîk a Kurd a Ewropayê (KCDK-E) ya li dijî êrîşên dagirkeriyê li pêşiya îstasyona trenê ya navendî ya Winterthurê li hev civiyan. Piştî deqeyek rêzgirtinê ji bo bîranîna Şehîdên Azadiya Kurdistanê, Berdevka Yekîtiya Jinên Kurd a Swîsreyê (YJK-S) Selma Surer daxuyanî da.
Xayintiya Barzaniyan em ji bîr nakin
Selma Surer êrîşên dagirkeriya Tirk bi bîr xist û got,’’Weke tê zanîn çend roj in li Başûrê Kurdistanê êrîşên li ser ciwanên me, gerîlayên me û gundên me yên li wir dewam dikin. Jixwe ev êrîş sê sal in bêyî navber dewam dikin. Lê vê carê bi destê Malbata Barzanî bi awayekî eşkere êrîşên dagirkeriyê dewam dikin. Em kesên li Ewropayê dijîn; çi dibe bila bibe em ê li kolanan bin. Em ê dengê xwe bilind bikin. Divê tu kes vê xiyaneta Barzaniyan ji bîr neke. Weke duh em îro jî bi gerîlayên xwe re ne. Divê her kes li dijî van êrîşên dagirkeriyê dengê xwe bilind bike.”
BASEL
Li bajarê Basel ê Swîsreyê jî êrîşên dagirkeriyê hatin protestokirin. Kurdistanî û şoreşgerên Tirkiyeyê yên li Baselê, li qada Clara li hev civiyan.
Di çalakiyê de metna çapemeniyê ya ji aliyê CDK-Basel û Meclîsa Jinê ya Ronahî ve li dijî êrîşên dagirkeriyê hatibû amadekirin, hate xwendin û çalakî bi dirûşmeyan bi dawî bû.
Êrîşên dagirkeriyê wê sibê li Lozan û Luzernê bên protestokirin. Navnîşanên ku çalakî lê bên lidarxistin wiha ne:
HAMBURG
Li bajarê Hamburg ê Elmanyayê li dijî êrîşên dagirkeriyê yên dewleta Tirk ên li ser Başûrê Kurdistanê çalakiyek hate lidarxistin.
Çalakî bi pêşengiya endamên Tevgera Ciwanên Şoreşger (TCŞ) hate lidarxistin. Di çalakiyê de bertek nîşanî êrîşên dagirkeriyê û sewqiyeta leşkerî ya dewleta Tirk bi PDK’ê re pêk anî, hat dayîn.
Gelek welatparêz û dostên wan tevlî çalakiya li pêşiya Hamburg Hachmannplatzê bûn û berxwedana Gerîlayên Azadiyê silav kirin ku li çiyayên Kurdistanê tevî xiyanet û hemû hêza teknîkî li ber xwe didin û hevkariya PDK’ê ya bi dewleta Tirk re şermezar kirin.
Endamê Parlementoya Hamburgê Martîn Dolzer û Siyasetmedar Nihat Akdogan ku tevlî çalakiyê bûn berxwedana Gerîlayên Azadiya Kurdistanê silav kirin û destnîşankirin ku têkoşîna gelê Kurd wê dewam bike. Dolzer, bang li raya giştî ya navneteweyî kir û diyar kir ku divê li dijî polîtîkayên êrîşkar ên dewleta Tirk rabin.
ANF