- Kurdistaniyan û dostên wan li seranserê Ewrûpayê got, dagirkerên Tirk li Efrîna dagirkirî jinan û Kurdan qir dikin. Xwestin ji ber vê yekê berpirsiyar û nexasim jî serokkomarê Tirk Erdogan bê dadgehkirin.
Li ser banga TJK-E’yê li gelek navendên Ewrûpayê û Awustralyayê Kurdistaniyan û dostên wan, bang li saziyên navneteweyî kir da ku hewl bidin ji bo dadgehkirina serokkomarê Tirk Tayyip Erdogan ji ber sûcên dema şer û qirkirina jinan li Efrînê.
Dewleta Tirk 18´ê Adara 2018´an Erfrîn dagir kiribû, lê belê êrişên wê yên talankirin, koçberkirin, qirkirina Kurdan û jinan heta îro jî dewam dikin. Ev sûcên li dijî mirovahiyê li Elmanya, Swîsre, Fransa, Danîmarka, Qibris û Awustralyayê hatin protestokirin.
Tevgera Jinên Kurd a Ewrûpayê (TJK-E) 20´ê Sibatê ev çalakiyên hanê organîze kirin. Kurdistaniyan, saziyên wan, pêkhateyên Yekîtiya Hêzê ya Demokratîk a Ewrûpayê, û çepgirên Elman jî destek dan çalakiyan. Wan ji bo jinên êşkence û destdirêjî li wan bûyî doza edaletê kir û xwest serokkomarê dewleta Tirk Tayyip Erdogan ji ber vê bê dadgehkirin.
Çalakgeran xwest Neteweyên Yekbûyî bi lezgînî zend û bendan vemale û Konseya Ewrûpayê jî ji ber sûcên dema şerî yên li Efrînê, cezayan li ser dewleta Tirk a dagirker ferz bike.
BERLÎN: Li paytexta Elmanyayê Berlînê, li Meydana Alexanderplatzê çalakger li ber konsolosxaneya Rûsyayê hatin cem hev. Li vir çalakgeran bi bîr xist ku demografiya Efrînê bi dagirkeriyê re hatiye guherandin. Çalakger paşê heta bi Brandenburg Torê meşiyan.
DUSSELDORF: Li bajarê Elmanyayê Dusseldorfê meş û mitîng bi heman armancê hebû. Qederê hezar Kurdistanî tevlî meşa li ber DGB Hausê destpêkirî, bûn. Meşê heta bi Corneliusplatzê dewam kir. Hevseroka PYD’ê Eyşê Hiso, berî ku meş dest pê bike bi rêya telefonê axivî û got “Dewleta Tirk ev sê sal in ku dixwaze ruhê Efrînê tarî bike. Lê em vê dibêjin, Efrîn bi hebûn, berxwedan, cografya û nasnameyên jinên berxwedêr zindî ye. Em weke Rojava hêz û morala xwe ji gelê xwe yê berxwedêr digirin. Em ê ji bo Efrînê her tim li ser lingan bin. Efrîn çavkaniya me ye.”
FREIBURG: Li bajarê Elmanyayê Freiburgê qirkirin û êrişên li dijî Efrînê hate şermezarkirin. Çalakî li qada Alte Synagogeyê hate lidarxistin. Di çalakiyê de ji bo kampanyaya ‘Ji bo darizandina dîktator 100 sedem û 100 hezar îmze’ îmze hatin komkirin.
OLDENBURG: Li bajarê Elmanyayê Oldenburgê jî sûcên şer ên ku dewleta Tirk li Efrînê kiribû bi meşekê hate protestokirin. Bi banga Meclîsa Jinan a Zelalê û Meclîsa Gel a Aurichê meş li qada Marktplatzê dest pê kir. Di çalakiyê de ji bo tevlîbûna konê berxwedana parastina Şengalê ya ku wê di 25, 26, 27’ê Sibatê de li Oldenburg Langestraasseyê bang hate kirin.
KIEL: Li vî bajarê bakurê Elmanyayê jî bi meşekê qirkirina jinan û Kurdan a li Efrînê hate protestokirin. SKB, MLKP, FEDA, TEV-ÇAND Kîel û Înîsîyatîfa Rojava tevlî çalakiyê bûn.
MUNCHEN: Li bajarê başûrê Elmanyayê di çalakiya li dijî Konferansa Ewlekariyê ya NATO’yê ya rêxistinên çepgir ên Elman de sûcên şer ên dewleta Tirk jî hatin protestokirin. Di çalakiyê de wêneyên sivîlên ku dewleta Tirk ew li Efrînê qetil kirine hatin hildan.
