Benî Sedr le ruwangey minewe

Hesen QAZÎ nivîsand —

Şemî 10 Tîrmeh 2021 - 04:07

Sazmanî Înqîlabî u Kurdistan (85)


Mêhdî Xanbaba Têhranî û dozî Kurdistan


Beşêk le giftugoy Hemîd Şewket legel Mêhdî Xanbaba Têhranî
Awrêk le bizûtnewewî çep le Iran le nawewe, giftugo legel Mêhdî Xanbaba Têhranî, çapî yekem beharî 1989

Şewket: Be bawerî to wedîhatnî pirênsîpî xudmuxtarî le sîstimêkî fêdratîv da heldesûrrê. Ewey têgeyiştinî dozeke dijwar deka eweye ke Kurdekan le duway şoriş daway xudmuxtarîyan dekird le Komarî Îslamî. Duwatrîş legel îtîlafêk kewtin ke le mîsaqekey da sîstimî hukûmetî dahatûy wek komarî dêmokratîkî Îslamî pêşbînî kirdbû, wa wênaçê ke ewan pirênsîpî xudmuxtarîyan bestibêtewe be berqerarî sîstimî fêdratîv, çunke eger wa ba ew demî dawxwazêkî awa le rêjîmî Îslamî bê mana debû.
Xanbaba Têhranî: Kurdekan pirênsîpî xudmuxtarîyan be sîstimî fêdratîv nebestewe. Hîzbî Dêmokratî Kurdistan yek le rêga çaresereyekanî kêşeke be qubûlî komarî fêdratîv debînê. Ew hîzbe wekû her hêzêkî riyalîst legel xebat le ser binemay waq'îyetekan û deretane 'emelîyekan bîrokey xoy berew pêşewe debird. Her boye Hîzbî Dêmokratî Kurdistan tenanet le sîstimî komarî îslamîş da wek pêşû le ser mafî xudmuxtarî Kurdistan pêdagrî dekrid. Babetî serekî le gelaley xudmuxtarî da qubûlî mafî dêmokratîkî xelkî Kurdistan e û her hêzêkî dêmokratî ke bawerî be ramanî dêmokratîsm heye, debê helwêst û gelaley fikrî xoy le ast ew doze da be rûnî derbibrê. Emin ew mafe wekû îznî qisekirdin be zimanî daykî û sîstimî perwerdey mindalan û mêrmindalanî Kurdistan be zimanî Kurdî û berêwebirdinî karubarî nawçe be dest xelkî wênderê dezanim. Lewaneye kesanêk xudmuxtarî be manay ciyabûnewey Kurdistan le Iran lêk denewe. Emin ew lêkdaneweye le pirênsîpî xudmuxtarî be nadrust dezanim û pêm waye, berjewendî û bextewerî Kurdekan le parastinî yekparçeyî erzî Iran daye. Bo ewey ke rûn bê lêy ziyad dekem le beranber meylî ciyawazîxwazane da ke be bawerî min lem qonaxe le peresendinî abûrî û sin'atî dinya da corêk geranewe ye berew diwawe, be hemû hêzî xomewe radewestim û eger pêwîst bê be serî pîrî şerî dekem. 

Şewket: Eger şiteke ew coreye ke to deylêy le waqî' da pêkêşî le ser distewajey "xudmuxtarî" le ber çîye ke ew hemû kêşeyey saz kirduwe?
Xanbaba Têhranî: Minî Taranî xo qise wêjî Kurdekan nîm. Ew şitaneş ke lêre deyanlêm akamî giftugoy be salanî dûr û dirêje legel ewan çi le Iran, çi le danîştinekanî kobûnewekanî Şûray Mîlî Muqawemet û çi le penay çiya serberzekanî Kurdistan, ke lew bareye qisem legel kirdûn û destim kewtûwe. Qasimlû însanêkî behoş û be zewqe û bîrurayekî serincrakêşî heye lew bareyewe. Ew dellê “mafî ême biden be ême, her nêwêkî detanewê lêy binên. Mafî ême be nîwe biden, belam nawî xudmuxtarî le ser la meben.”

Şewket: Hîç pirsîwte ke hestyarî le ser ew destewajeye le ber çîye?
Xanbaba Têhranî: Qasimlû delê Kurdekan zaraweyekyan heye pêy delên "Kurde Namûsî". Ew lefzî xudmuxtarîyeş bo ewan buwe be "kurde namûsî"yek, wate xîretêkî namûsî. Xudmuxtarî nawî şewî azadî ye bo Kurdekan ke le zeynî ewanda helkendrawe. Le rastîda wek gutim xudmuxtarî tenya lefzêk nîye û bo ewan ziyatir layenî armanî peyda kirduwe û buwe be heman “kurde namûsî”. Gemîyeke ke kurdekan suwarî bûn û le rûbarî siyasetî Iran da de cûle dan. Şayed tenanet le qonaxêk da nawerokî siyasetî bê nawendî yan pirênsîpî xo berêweberî be nawî xudmuxtarî şiyawî pejrandin bê. Baştire lew zemîneye da le ciyatî sadekirdnewey meseleke, le pêwendî legel dêmokrasî da boy bigerêyn be duway çareseriyek da.

Şewket: Sê babetî dîke mawetewe. Dewrî Benî Sedir le Kurdistan, radey nufuzî Şûrewî lew nawçeye û duwacar ew dewrey ke rewte çepekan le Kurdistan da gêrayan.
Xanbaba Têhranî: Le pêşda lemer pirsyarî yekemî to hewil dedem ta ew cêyey ke Benî Sedir denasim wulamit bidemewe. Be bawerî min, Benî Sedir le ast meseley Kurdistan dû helsukewit yan dû cor helwêstî ciyawazî hebû. Helbet eger le xoy bipirsî nikûlî lewe deka û delê hemîşe bîrurayekî hebûwe ewîş eweye ke rêzî le mafî xelkî Kurdistan girtûwe û be duway dozînewey çareser da bûwe ke takûteray dineder le Kurdistan be helkêşanî çek le hêzekanî erteş pêşyan be çareserî meseleke girtûwe. Waq'îyet eweye ke însan katêk deselatî be deste û katêk ke le opozîsyon daye, deselatî xawenî dewrî ciyawaze. Benî Sedir zemanêk ke le deselat daye, bê le berçaw girtnî pêwendî lêk ciyanekrawey duruşmekanî xelik yanî azadî, serbexoyî û 'edaletî komelayetî, zemanêk le tirsî dewrî serbexoyî wulat meylî têda pêk dehat bo pêşêlkirdnî azadîyekanî xelik. Bo numûne lew cêyey da ke le pêwendî letek têkhelçûnekanî Kurdistan da peyam denêrê ke ta damirkandnewey ew ajaweye çekmekanî le pay danakenê. Helbet eger legelî danîşî û lêy pirsî delê, mebestî nek xelik belkû ew kesane buwe ke temayan buwe erteş helweşênin. Kesanêk ke legel derewey sunûrekan pêwendîyan hebuwe. Dekrê îdî'ay awa bikrê Belam însan debê le ser ew mafaney ke qubûlyan deka, be taybetî le ser azadîyekan pêkêşî bika û belênî xoy neşkênê. Be bawerî min Benî Sedir le deselat da rêgay çareserî Kurdistanî ew core nepêwa ke êsta le opozîsyon da deypêwê û ew katey le deselat da bû hêndêk tirs û xofî hebû le dozî Kurdistan. Tirsî ewe bû ke le Kurdistan erteşêkî ciya le erteşî sertaserî durust bibê. Helbet nabê negutrê Benî Sedir ew tirsey le opozîsyon û serdemî beşdarî le Şûray Mîlî Muqawemetîş da her parast. Emin Benî Sedir be însanêkî şerîf, serbexo, azadîxwaz û neteweyî dezanim û le rûy 'atfîşewe sozim boy heye. Belam helwêstekanî le xulî yekemî serokayetî komar da û ew zemanî ke fermandeyî gişt hêzekanî be estowe bû ciyawaz bû le helwêstekanî mangekanî duwayî serok komarêtîyekey. Ew dû faqî bûney helsukewtî wî duwatir bûwe hoy peyda bûnî hêndêk dijwarî lemer îtîlafî opozîsyon.



Dirêjey heye...


parvê bike

   

Yeni Özgür Politika

© Copyright 2021 Yeni Özgür Politika | Mafên belavkirinê parastî ne.